SMS-mótmæli fyrir utan heimili Þorgerðar Katrínar

Mótmælendur eru að safnast saman fyrir utan heimili Þorgerðar Katrínar Gunnarsdóttur, varaformanns Sjálfstæðisflokksins. Þegar Vísir hafði samband við mann sem var á vettvangi voru fjórir komnir en fleiri virtust vera að koma til þess að mótmæla.

Mótmælendur voru meðal annars með potta og gjallarhorn.

Samkvæmt heimildum Vísis var mótmælendum send SMS um fyrirhugaðar mótmælaaðgerðir hópsins. Ekki er vitað hvaða hóp er um að ræða.

Þegar haft var samband við lögregluna á höfuðborgarsvæðinu höfðu engar upplýsingar borist um mótmælin.

Þorgerður Katrín hefur verið umdeild undanfarið og þá sérstaklega vegna skuldar eiginmanns hennar, Kristjáns Arasonar, en þær skuldir voru tíundaðar í rannsóknarskýrslu Alþingis.