Prestur krefst rannsóknar á þöggun kirkjunnar

Sigríður Guðmarsdóttir sóknarprestur vill að kirkjan viðurkenni vanmátt sinn í máli Sigrúnar Pálínu Ingvarsdóttir og að óháð sannleiksnefnd verði skipuð til að fara yfir málið í heild sinni.

Þetta kemur fram í grein sem Sigríður, sem er sóknarprestur í Grafarholtsprestakalli, skrifar í Fréttablaðið í dag. Sigríður leggur til að yfirstjórn kirkjunnar fari þess á leit við mannréttindamálaráðuneyti, félagsmálaráðuneyti og Siðfræðistofnun Háskóla Íslands að setja saman óháða sannleiksnefnd til að rannsaka ásakanir um þöggun íslensku þjóðkirkjunnar vegna meints kynferðisofbeldis Ólafs Skúlasonar.

Sigríður segir að þjóðkirkjan geti ekki leyst úr því máli sjálf og trúverðugleiki hennar sé að veði. Þá sé óhægt fyrir núverandi biskup Íslands að tjá sig með sannfærandi hætti um meint afbrot fyrrverandi biskups vegna ásakana á hendur honum sjálfum um að hann hafi með virkum hætti tekið þátt í að þagga málið niður árið 1996.

Í samtali við fréttastofu í dag sagði Sigríður að kirkjan ætti að viðurkenna vanmátt sinn og biðja um hjálp. Íslenska þjóðkirkjan megi ekki stjórnast af máttleysi eða yfirdrepsskap í viðbrögðum sínum næstu daga og vikur. Málið þurfi að rannsaka og það fyrir dómsdag.