Stelpurnar búnar í brúnku, lit og plokkun - Ungfrú Ísland valin í kvöld

Það verður mikið um dýrðir á Broadway í kvöld þegar Ungfrú Ísland 2010 verður valin. Fegurðardísirnar sem taka þátt hafa æft stíft fyrir keppnina síðustu vikur.

„Keppendur mættu í dag í svokallað kamerurennsli og um klukkan fjögur mættu þær í hár og smink og verða svo tilbúnar í slaginn í kvöld," svarar Guðrún Möller. Hún er einn dómaranna sem velur sigurvegarann sem Ungfrú Ísland 2009, Guðrún Dögg Rúnarsdóttir, krýnir í kvöld.

„Þær hafa verið að æfa stíft undanfarið. Á miðvikudaginn var generalprufa sem gekk ljómandi vel og í gær voru dómaraviðtöl. Þær eru allar búnar að fara í brúnku, lit og plokk og komnar með kjólana sína. Glæsilegar stelpur sem ætla að skemmta sér og áhorfendum á Skjá einum í kvöld," segir Guðrún.

Í meðfylgjandi myndasafni má sjá myndir af keppendum.

Á morgun birtum við svo flottar myndir af keppninni og gestunum á Broadway hér á Lífinu á Vísi.