Fyrirtækjum með báðum kynjum í stjórn fækkar

Fyrirtækjum með báðum kynjum í stjórn hefur fækkað á milli ára síðan ýmsir hagsmunaaðilar og stjórnmálaflokkar undirrituðu samstarfssamning um aukna hlutdeild kvenna í atvinnurekstri.

Þetta kemur fram í tilkynningu frá Félagi kvenna í atvinnurekstri. Árangur verkefnisins var kynntur á aðalfundi félagsins í dag, en fyrirtækið Creditinfo sá um mælinguna. Samningurinn var undirritaður fimmtánda maí á síðasta ári, svo tölurnar gefa mynd af þróuninni yfir eins árs tímabil.

Þá voru jafnframt kynnt gögn frá Creditinfo sem sýndu að þegar bæði kyn eru í stjórnum fyrirtækja sýna fyrirtækin betri útkomu í rekstri, lifi lengur, eru síður líkleg til að lenda í vanskilum og eru frekar með konur í forystustörfum.

Þrátt fyrir það hefur fyrirtækjum með báðum kynjum í stjórn fækkað um sextán talsins á tímabilinu. Á sama tíma fjölgaði fyrirtækjum með eingöngu konum í stjórn um tæp 400. Mest var fjölgunin meðal fyrirtækja með aðeins körlum í stjórn, en þeim fjölgaði um 1800.

Hlutdeild kvenna sem framkvæmdastjórar, stjórnarformenn eða varamenn er enn sambærilegt og fyrir ári síðan.