Alexander fór á kostum í Íslendingaslag

Íslenski landsliðsmaðurinn Alexander Petersson fór á kostum með hinu nýja liði sínu, Fuchse Berlin, er liðið vann öruggan útisigur á Hannover Burgdorf, 18-26.

Alexander skoraði 8 mörk í leiknum og Rúnar Kárason 3. Dagur Sigurðsson er þjálfari liðsins en Aron Kristjánsson þjálfar lið Burgdorf. Ásgeir Örn Hallgrímsson skoraði 3 mörk fyrir Burgdorf í leiknum og þeir Hannes Jón Jónsson og Vignir Svavarsson skoruðu báðir eitt mark.

Íslendingaliðið Rhein-Neckar Löwen komst óvænt í hann krappann gegn Balingen en marði sigur að lokum, 30-31. Ólafur Stefánsson skoraði 2 mörk fyrir Löwen en Róbert Gunnarsson komst ekki á blað.