Logi Geirsson: Minna hlutverk en áður

„Kroppurinn er klár og var þetta mín besta æfing hingað til á undirbúningstímabilnu," sagði Logi eftir æfingu íslenska landsliðsins í keppnishöllinni í Linz í dag.

„Það eru sextán manns í hópnum og ég lít á mitt hlutverk að ég gæti verið góð viðbót þegar þess verður þörf. Ég geri mér líka grein fyrir því að mitt hlutverk verður minna nú en á síðustu mótum. Enda er liðið búið að spila án mín í tæpt ár."

Hann á þó von á að koma sterkur inn þegar á hann verður kallað.

„Ég er að koma upp úr erfiðum meiðslum og ætla einfaldlega að gera mitt allra besta. Ég geri bara það sem þarf til að hjálpa liðinu. Mér er falið ákveðið hlutverk og það kemur betur í ljós síðar hvað það verður," sagði hann sposkur á svip.

Logi fór í aðgerð á öxl í mars síðastliðnum en hefur einnig verið að glíma við nárameiðsli að undanförnu. En hann hefur þó engar áhyggjur af sinni stöðu í landsliðinu.

„Við erum með þrjá leikmenn í þessari stöðu og Aron þar að auki. Óli G [Ólafur Guðmundsson] stóð sig mjög vel í Frakklandi um helgina og ég er því ekki í neinum vafa um að vinstri skyttan, sama hver er í þeirri stöðu, muni standa sig vel á þessu móti."