KB ráðgjöf hættir með Vista sparnað

Arion banki og KB ráðgjöf hafa hætt að bjóða upp á nýja samninga í lífeyrissparnaðarleiðinni Vista á meðan bankinn endurskoðar reglur um upphafsþóknun í kaupsamningunum.

Fréttablaðið fjallaði um málið í síðustu viku og segir Iða Brá Benediktsdóttir, framkvæmdastjóri samskiptasviðs Arion banka, að ákveðið hafi verið að hætta að gera nýja samninga við sjóðfélaga um viðbótarlífeyrissparnað í Vista á meðan efni fréttarinnar sé skoðað innan bankans.

„Það hefur verið um nokkurt skeið unnið að breytingum á Vista í samráði við eftirlitsaðila. Og þær breytingar snúa meðal annars að ákveðnum reglum sjóðsins um upphafsþóknun,“ segir Iða Brá.

Olaf Forberg, framkvæmdastjóri KB ráðgjafar, vildi ekki tjá sig um málið að öðru leyti en því að staðfesta að sölu á Vista hafi verið hætt á meðan vörsluaðili, Arion banki, fari yfir málavexti.

Þeir viðskiptavinir Arion banka sem hafa keypt sér séreignarsparnaðarleiðina Vista hjá KB ráðgjöf gætu átt yfir höfði sér tugþúsunda bakreikninga frá skattinum. Ástæðan er sú að sex greiðslur, frá þriðja mánuði samningsins til þess áttunda, renna ekki í lífeyrissparnað viðskiptavina, heldur í upphafsþóknun til KB ráðgjafar. Eru það fjögur prósent af heildartekjum viðskiptavina Vista, fyrir skatt.

Lífeyrissparnaður er undanþeginn skatti, en önnur afleidd gjöld eins og upphafs- og söluþóknanir til þess fyrirtækis sem á og rekur vöruna, eru það ekki. Þetta gerir það að verkum að Ríkisskattstjóri hefur heimild til þess að fara allt að sex ár aftur í tímann og rukka inn vangoldin skattgjöld af þessum sex mánaðargreiðslum hjá viðskiptavinum Vista.

„Þetta fyrirkomulag hefur verið til skoðunar hjá ýmsum fyrirtækjum sem eru að versla með vöru eins og séreignarsparnað,“ sagði Indriði H. Þorláksson, ráðuneytisstjóri í fjármálaráðuneytinu og fyrrverandi ríkisskattstjóri, í samtali við Fréttablaðið. „Þau vilja meina að þetta sé heimilt og það hefur verið ágreiningur við skattayfirvöld um það.“

sunna@frettabladid.is