Björgólfur lagði áherslu á að halda Fríkirkjuveginum

Björgólfur Thor Björgólfsson lagði mikla áherslu á það við 1.200 milljarða skuldauppgjör að halda í sinni eigu sögufrægu húsi við Fríkirkjuveg, sem langafi hans lét reisa fyrir hundrað árum. Björgólfur segir að engar skuldir verði afskrifaðar en inn í uppgjörinu er hluti skulda föður hans.

Björgólfur Thor Björgólfsson fullyrðir að engar skuldir verði afskrifaðar, en hann og fjárfestingafélag hans Novator, gengu í vikunni frá skuldauppgjöri við fjölmarga banka. Þeirra á meðal eru Deutche Bank, Barclays, skilanefndir Glitnis og Landsbankans, Straumur og Arion banki. Skuldirnar nema samtals 1.200 milljörðum en þar vega skuldir vegna Actavis lang þyngst.

Í uppgjörinu felst að Björgólfur Thor verður áfram hluthafi í Actavis, pólska fjarskiptafyrirtækinu Play, CCP og Verne Holding. Allar hans eignir liggja til grundvallar, samkvæmt tilkynningu. Arðurinn af þeim og verðmæti, verði þær seldar, ganga síðan á móti skuldunum. En það eru ekki einungis eignarhlutir í stórum fyrirtækjum sem eru undir því persónulegar eigur Björgólfs Thors ganga einnig til uppgjörs skuldanna.

Húsið við Fríkirkjuveg hefur persónulegt gildi fyrir Björgólf en langafi hans Thor Jensen lét reisa það fyrir hundrað árum síðan. Húsið er í dag veðsett upp í rjáfur en Björgólfur keypti það fyrir nokkrum árum.

Björgólfur Guðmundsson, faðir Björgólfs Thors, var úrskurðaður gjaldþrota síðasta sumar. Ellefu milljarða króna skuld hans kemur inn í skuldauppgjör sonarins. Þá hyggst Björgólfur Thor gera upp hluta af skuldum Samsonar, þá 40 milljarða sem feðgarnir voru í persónulegum ábyrgðum fyrir.

Ekki fékkst viðtal við Björgólf Thor í dag. Í tilkynningu er haft eftir honum að hann hafi um tíma staðið frammi fyrir persónulegu gjaldþroti. Samkomulagið sem hann hefur nú gert við lánadrottna sína þýði að hægt sé að byggja upp og selja eignir á eðlilegu verði, en með því fáist meira upp í skuldir en ella.