Utanríkisráðherra Noregs yfir sig hrifinn af Heru Björk

Jonas Gahr Störe, utanríkisráðherra Noregs, óskaði sérstaklega eftir því að fá að hitta Heru Björk og íslenska Eurovision-hópinn í gær. Íslensku þátttakendurnir urðu að sjálfsögðu við bón norska utanríkisráðherrans þrátt fyrir mikið annríki enda hefur fjölmiðlaáhuginn sjaldan eða aldrei verið meiri.

„Ég veit eiginlega ekkert hvernig stóð á þessum fundi," segir Örlygur Smári, höfundur Je ne sais quoi, en það tryggði sér sæti í úrslitum Eurovision á síðustu stundu eins og frægt er orðið.

Örlygur segir að þau hafi fengið einhverja klukkutíma til að undirbúa sig. „Það var síðan farið með okkur upp á efstu hæð hótelsins og þar var búið að undirbúa þennan fund," segir Örlygur en Störe var í fylgd með norska ríkissjónvarpinu sem tók fundinn upp. Lagasmiðurinn snjalli segir Störe hafa verið sérlega áhugasaman um ástandið á Íslandi og ekki síður hvernig staðan væri vegna eldgossins.

„Hera svaraði þessu bara af sinni alkunnu snilld, svo var lagið tekið og við gáfum honum diskinn," útskýrir Örlygur. Störe er ekki ókunnur Íslendingum því hann heimsótti landið í nóvember 2008. Og ekki ólíklegt að þar hafi hann kynnst tónlist Heru Bjarkar.

Ekki var unnt að fá viðtal við Heru Björk um málið en Valgeir Magnússon, umboðsmaður hennar, segir ásóknina í íslensku söngkonuna hafa verið gríðarlega og að það sé næstum því barist um viðtölin. Undir það tekur Örlygur sem hefur keppt þrisvar sinnum í Eurovision.

„Við höfum fengið alveg ótrúlegar viðtökur og finnum fyrir alveg svakalegum meðbyr. Ég man hreinlega ekki eftir öðru eins," segir Örlygur sem viðurkennir að hann hafi verið með hjartað í buxunum þegar aðeins eitt umslag var eftir í undankeppninni á þriðjudaginn.

„Við fundum það á okkur að við yrðum síðust upp úr hattinum og þegar við sáum glitta í hornið á íslenska fánanum stóðum við öll upp og fögnuðum, tilfinningarnar tóku eiginlega bara öll völd."

freyrgigja@frettabladid.is