Anna Margret Olafsdottir: Tryggjum rétt leikskólabarna til náms og leiks

Leikskólinn er fyrsta skólastigið í skólakerfinu skv. lögum um leikskóla (2008) og þar skal fara fram menntun og umönnun barna undir skólaskyldualdri. Í leikskólum borgarinnar er unnið metnaðarfullt starf og það gríðarlega mikla nám barnanna sem fer þar fram er oft vanmetið, kannski af því að leikurinn er sú námsaðferð sem leikskólarnir nota.

Rannsóknir sýna að nákvæmlega sú leið skilar mestum árangri í námi barna. Foreldrakannanir á vegum Leikskólasviðs hafa sýnt mikla ánægju foreldra með leikskólastarfið og þarf að kappkosta að svo verði áfram. Á þeim erfiðu tímum sem við göngum nú í gegnum hefur því miður þurft að beita niðurskurðarhnífnum harkalega þó leikskólunum hafi verið hlíft eins og hægt var með minni hagræðingarkröfu. Starfsfólk leikskólanna hefur lagt á sig mikla vinnu til að halda uppi faglegu starfi og óbreyttri þjónustu og á heiður skilinn fyrir það. Ég tel að nú verði ekki gengið lengra og leikskólarnir séu farnir að nálgast hættumörk.

Þrátt fyrir miklar áherslur á að verja grunnþjónustuna er þjónustan farin að skerðast og við verðum að vera heiðarleg og horfast í augu við það. Fólk getur síðan deilt um hvort það sé grunnþjónustan sem hafi skerst eða ekki.Afleysingastörf hafa verið skorin niður og bitnar það m.a. illa á undirbúningstímum fagfólks. Af því leiðir að minni tími er til að undirbúa faglegt starf leikskólans sem bitnar á endanum á þjónustu við börnin og er starfsfólk uggandi vegna þessa. Undirmönnun vegna veikinda starfsmanna er víða vandamál og frábært starfsfólk leikskólanna leggur mikið á sig til að "láta daginn ganga upp" en þetta þarf að lagfæra. Símenntun starfsmanna hefur látið undan síga að undanförnu, kaup á kennslugögnum stórlega skorin niður o.s.frv. Matarkostnaður hefur hækkað gríðarlega eins og allir vita og sífellt erfiðara er að halda uppi þeim gæðum sem krafist er. Tilraunaverkefni er þó að fara í gang í Vesturbænum í leik- og grunnskólum um sameiginleg matarinnkaup og verður fróðlegt að fylgjast með því hvernig til tekst.

En það hefur ýmislegt jákvætt gerst í leikskólamálum á kjörtímabilinu og verður að halda því til haga líka. Hlutfall fagfólks hefur aldrei verið hærra og stöðugleiki í starfsmannahaldi er mikill. Sérkennsla og stuðningur við börn af erlendum uppruna eru í nokkuð góðum málum. Hvatningarverðlaun leikskólaráðs eru viðurkenning til starfsmanna leikskólanna fyrir vel unnin störf, Brú er samræðuvettvangur fagfólks og foreldra á leik- og grunnskólastigi og Stóri leikskóladagurinn er haldinn árlega þar sem leikskólum borgarinnar er boðið að kynna sameiginlega ýmis verkefni úr sínum skóla.

Á þeim tímum sem við erum að upplifa núna eru börnin það sem við verðum að setja í algjöran forgang. Við megum aldrei gleyma því að leik- og grunnskólar gegna mikilvægu hlutverki fyrir viðkvæmustu þegnana.. Þessi hópur er framtíðin, það eru þau sem taka við keflinu og við höfum ekki leyfi til annars en að veita þeim þá bestu þjónustu sem völ er á svo þau geti áfram leikið og lært undir leiðsögn fagfólks.

Í komandi kosningum leggur Framsóknarflokkurinn í Reykjavík mikla áherslu á að tryggður verði réttur leikskólabarna til náms og leiks og staðinn verði vörður um þetta fyrsta skólastig sem og grunnskólastigið. Sérkennsla auk stuðnings við börn með fleiri en eitt móðurmál eru þættir sem vega þungt í skólakerfinu og ber að passa upp á að sú þjónusta skerðist ekki.

Höfundur er leikskólastjóri og skipar 10. sæti á lista Framsóknarflokksins í Reykjavík.