Lindsay áfram í ruglinu í New York og Cannes

Leikkonan Lindsay Lohan heldur áhugamönnum um ævintýri hennar enn við efnið. Um helgina mætti hún til New York í partý á staðnum 1Oak. Dómari úrskurðaði nýlega að hún ætti að drífa sig í meðferð þannig að hún var ekki á perunni eins og venjulega.

Samt sem áður tókst henni að gera allt vitlaust. Hún settist við borð hjá fyrirsætunni Jessicu Stam og fylgir sögunni að þær þekktust ekki fyrir. Ekki leið samt á löngu þar til Lindsay tók kast, hellti drykk yfir fyrirsætuna og heimtaði að hún yrði rekin út af staðnum. Það gerðist ekki þannig að hún strunsaði sjálf út.

Daginn eftir fór hún á kvikmyndahátíðina í Cannes þar sem hún sást í veislu á snekkju og rúllandi á gangstétt. Hún þarf síðan væntanlega að drífa sig aftur til Bandaríkjanna þar sem dómari tekur ölvunarakstur hennar fyrir á fimmtudag.