Endurskipulagningu Sparisjóðs Norðfjarðar lokið

Samningur um fjárhagslega endurskipulagningu Sparisjóðs Norðfjarðar við Seðlabanka Íslands hefur verið undirritaður og öll skilyrði hans uppfyllt.

Sjóðurinn varð fyrir eignatjóni í fjármálahruninu en strax var hafist handa við að bæta eiginfjárstöðu sjóðsins og um áramótin 2008/2009 var stofnfé aukið um 253 milljónir króna. Nýja stofnféð kom allt frá aðilum í Fjarðabyggð.

Í tilkynningu frá Sparisjóðnum kemur fram að þeir aðilar sem komi að endurskipulagningunni séu auk Seðlabankans, Byggðastofnun, sveitarfélagið Fjarðabyggð, fyrirtæki og einstaklingar í Fjarðabyggð.

Stofnfjárhlutir Seðlabankans og Byggðastofnunar verða framseldir til Bankasýslu ríkisins sem mun fara með 49% eignarhlut í sjóðnum.