Regnboganum lokað 1. júní

Ef svo fer sem horfir verður kvikmyndahúsinu Regnboganum lokað 1. júní næstkomandi. Jón Eiríkur Jóhannesson, rekstrarstjóri kvikmyndahúsa Senu, var ekki reiðubúinn til að staðfesta þá dagsetningu í samtali við Fréttablaðið í gær en sagði hlutina eiga að skýrast í næstu viku.

„Það eru ýmsar umleitanir í gangi, það er ekkert ákveðið og ég á fremur erfitt með að tjá mig um það á þessu stigi málsins," segir Jón Eiríkur.

„Ég reikna með því að við tökum ákvörðun á þriðjudaginn og þá kemur í ljós hvort við lokum og skrúfum okkar dót í burtu eða hvort það verður áframhaldandi rekstur kvikmyndahúss þarna," segir Jón Eiríkur.

Eins og Fréttablaðið hefur greint frá rennur leigusamningur Senu og Cube Properties, sem á húsnæðið, út um áramótin. Hefðbundnar kvikmyndasýningar virðast samkvæmt þessu ekki lengur svara kostnaði í Regnboganum. Ekki náðist samband við forsvarsmenn Cube Properties við vinnslu fréttarinnar en Sveinn Björnsson, framkvæmdastjóri fasteignafélagsins, sagði á dögunum að enginn hefði falast eftir húsnæðinu.

Jón Eiríkur staðfestir að nokkrir hópar hafi sett sig í samband við Senu um hugsanlega framlengingu á starfsemi kvikmyndahúss í sumar. Samfylkingin hyggst síðan leggja fram tillögu á þriðjudaginn um að borgin styðji við tilraunaverkefni um að kvikmyndahúsið Regnboginn verði kvikmyndasetur og nokkurs konar heimili kvikmyndanna.

Samkvæmt tillögunni yrði framlag borgarinnar þá falið í því að taka þátt í leigukostnaði fram á haust og veita stuðning og ráðgjöf við gerð samþykkta og stofnun félags um rekstur og starfsemi. - fgg