Spáir minnstu verðbólgu frá sumrinu 2005

Greining Íslandsbanka spáir því að vísitala neysluverðs (VNV) hækki í október um 0,4% frá septembermánuði. Gangi spáin eftir mun verðbólga hjaðna úr 3,7% í 3,0% og hefur þá ekki verið minni síðan í júní 2005.

Fjallað er um málið í Morgunkorni greiningarinnar. Þar segir að aðal hækkunarvaldur VNV að þessu sinni er gjaldskrárhækkun OR, sem tók að verulegu leyti gildi 1. október. Raunar má segja að án þeirrar hækkunar myndi vísitalan líklega standa í stað eða jafnvel lækka lítillega í októbermánuði.

Þar hjálpast að áhrif gengisstyrkingar krónu í sumar, sem enn virðast vera að koma fram í ýmsum innfluttum vörum, og lítil innlend eftirspurn sem ýtir á verslanir og þjónustuaðila að halda álagningu í algeru lágmarki.

„Auk heldur gerum við ráð fyrir því að reiknuð húsaleiga, sem að mestu endurspeglar verðþróun á íbúðamarkaði, lækki lítillega í mánuðinum," segir í Morgunkorninu.

„Verðbólguþrýstingur virðist nokkru minni þessa dagana en við gerðum ráð fyrir í síðustu spá okkar. Þar hefur áhrif að innlend eftirspurn virðist hafa minnkað að nýju með lækkandi sól og lítur út fyrir að verslanir teygi sig býsna langt um þessar mundir hvað varðar lága álagningu og sértilboð hvers konar til þess að glæða viðskipti sín.

Útlit er nú fyrir að VNV hækki um 1,1% á síðasta fjórðungi ársins og að verðbólga í árslok verði komin niður í 2,4%, sem þýðir að Seðlabankinn nær loks hinu langþráða verðbólgumarkmiði sínu í fyrsta sinn frá því á vordögum árið 2004."

Á næsta ári gerir greiningin ráð fyrir að verðbólga verði áfram í grennd við 2,5% markmið Seðlabankans, en að meðaltali spáir hún 2,3% verðbólgu á árinu 2011. Það er þó háð því að gengi krónunnar haldist stöðugt, að kjarasamningum á vinnumarkaði lykti með hóflegri hækkun launa að jafnaði og að ekki verði veruleg hækkun til viðbótar á óbeinum sköttum og opinberum gjaldskrám.

„Á hinn bóginn er það forsenda spár okkar að íbúðaverð taki að hækka á nýju ári og hækki um nærri 4% yfir árið 2011. Láti bati á fasteignamarkaði á sér standa mun það halda aftur af hækkun VNV næstu misserin," segir í Morgunkorninu.