Neytendasamtökin berjast gegn SMS-lánum

Neytendasamtökin segja sláandi að SMS lánafyrirtækið Kredia skuli markaðssetja rándýr skammtímalán grimmt, skömmu eftir fjármálahrunið. Þau harma þá þróun sem er að verða á lánamarkaði. Samtökin sendu ítrekun til viðskiptamálaráðherra þar sem óskað er eftir að ráðherra bregðist við þessum nýju fyrirtækjum á lánamarkaði með breytingu á lögum.

„Það er greinilega mikil samkeppni milli fyrirtækja sem lána peninga í gegnum farsíma og taka fyrir það mjög háa þóknun. Markaðssetningin er ágeng og virðist frekar beinast af veikum hópi neytenda sem auðvelt er að freist," segir í frétt frá samtökunum.

Nýjasta útspil Kredia beinist að þeirra helsta markhópi sem eru 18 ára ungmenni. Auglýsingin er send í lokuðu umslagi merkt LEYNDÓ. Í umslaginu er pési með yfirskriftinni „Engar neyðarlegar uppákomur!” Þar er mynd af ungum manni sem er að bjóða kærustunni í bíó. Hann á ekki pening fyrir bíómiðunum, því hann fær ekki heimild á kortið sitt. Þá tekur hann upp gemsann og slær Kredia um lán og getur þá gert „það sem hann vill” eins og fram kemur í umræddum pésa. Pésinn birtir einnig lukkukóða til að tæla ungmennin inná heimasíðu Kredia þannig að það fari örugglega ekki framhjá þeim hversu einfalt það er að taka lán, segir í fréttinni.

„Það er spurning hvort unga stúlkan ætti ekki að forða sér hið snarasta úr þessu sambandi. Það byrjar alla vega ekki efnilega ef bíóferðin er upp á krít og það ekki ódýrri. Reyndar eru skilaboðin í auglýsingunni frekar gamaldags og karlmaðurinn settur í einkennilega stöðu. Það ætti ekki að vera neyðarlegt að hafa ekki efni á bíóferð til að vinna hjarta ungra stúlku. Vonandi hefur hann yfirsýn yfir fjárhagsstöðu sína og ætti ekki að fara í bíó nema vera viss um að eiga fyrir miðanum. Stúlkan ætti kannski að borga miðann sinn sjálf en ekki treysta á mann sem tekur lán  fyrir bíómiða,” segir í fréttinni.

Rannsóknarskýrslan er nýkomin út og í siðfræðikafla skýrslunnar er m.a. fjallað um ágenga markaðssetningu á lánum. Það hversu skuldsett heimilin í raun voru þegar hrunið varð gerir endurreisnina mun erfiðari en annars. Að lánafyrirtæki skuli markaðssetja rándýr skammtímalán svona grimmt, svona stutt eftir hrunið er sláandi, segir í fréttinni.