Jesse James í meðferð

Hataðasti maðurinn í Hollywood um þessar mundir, Jesse James, er farinn í sömu meðferð og Tiger Woods. James hefur viðurkennt fyrir umheiminum að hann sé háður kynlífi með ókunnugum konum. En sú fíkn batt enda á hjónaband hans og Söndru Bullock.

James er sagður allur af vilja gerður til að vinna bug á fíkn sinni en hann er sagður hafa átt í ástarsambandi við að minnsta kosti fjórar konur á meðan hann var giftur Óskarsverðlaunaleikkonunni. James fetar þar með í fótspor margra þekktra karlmanna sem hafa háð slíka baráttu en meðal þeirra eru áðurnefndur Woods, Michael Douglas og X-Files-leikarinn David Duchovny.

Af skilnaði þessa sérkennilega pars er það annars að frétta að James hefur lofað Söndru að hún fái hitta börnin hans en leikkonan gekk þeim nánast í móðurstað. Samkvæmt einhverjum vefmiðlum í Vesturheimi er Sandra að velta því alvarlega fyrir sér hvort hún eigi að sækja um forræðið yfir þeim.