Lögleg en gamaldags vinnubrögð

Forráðamenn Handknattleikssambands Íslands funduðu með starfsmönnum á leik Íslands og Austurríkis á EM í handbolta nú í hádeginu.

Einar Þorvarðarson, framkvæmdarstjóri HSÍ, og Knútur Hauksson formaður óskuðu eftir fundinum sem fór fram í dag.

„Við sendum inn greinargerð og óskuðum eftir því að hitta viðkomandi aðila og fara yfir leikinn," sagði Einar en Austurríki skoraði þrjú síðustu mörk leiksins á lokamínútunni og tryggði sér þar með jafntefli.

Dómarar leiksins, sem voru frá Rúmeníu, stöðvuðu leiktímann eftir að Austurríkis skoruðu 35. og 36. mörk sín í leiknum sem lauk með 37-37 jafntefli.

„Við fórum yfir þessa lokamínútu leiksins og útskýrðum okkar mál og túlkun á leikreglunum."

„Eftir að reglum var breytt um „hraða miðju" hætta dómarar að stöðva tímann eftir að mark er skorað. Ef þeim finnst hitt liðið vera að tefja hafa þeir leyfi til að beita hendinni og dæma svo leiktöf eftir fimm sekúndur."

„Dómararnir hafa vald til að stöðva tímann. Þetta er hins vegar ekki gert lengur og þarna tóku þeir upp mjög gamaldags vinnubrögð," sagði Einar.

„Þeir báru fyrir sig að þetta hafi þeim verið kennt en við bentum á að þetta væru dómarar sem hefðu dæmt á Ólympíuleikum og fleiri stórmótum."

„Starfsmenn leiksins viðurkenndu að dómarar gerðu þarna annað en þeim hafði verið kennt."

Þeir komu einnig þeim skilaboðum á framfæri að frammistaða dómaranna verði að hafa sínar afleiðingar.

„Ef lið standa sig illa á mótinu fara þau heim. Það hlýtur að gilda það sama um dómarana og einfalt mál að senda þá heim ef þeir standa sig ekki vel."

Hins vegar er óvitað hvað verður og hvort rúmenska dómaraparið fái aftur að dæma á Evrópumeistaramótinu í Austurríki.