Aron: Minn stærsti leikur á ferlinum

Þó svo að ferill hins nítján ára Arons Pálmarssonar telji ekki mörg ár er óhætt að segja að hann hafi spilað leik lífs síns í kvöld. Hann skoraði fimm mörk í glæsilegum sigri á Dönum á EM í handbolta, 27-22.

„Ég var orðinn fáránlega hungraður,“ sagði Aron við Vísi eftir leikinn en hann kom lítið sem ekkert við sögu í fyrstu tveimur leikjum Íslands á mótinu.

„Ég veit ekki hvort Gummi vildi hvíla mig út af hnénu eða hvað sem það var. En ég var alla vega orðinn mjög hungraður.“

„Þetta var líka algjör úrslitaleikur og það kom bara ekki til greina að koma inn á völlinn og standa sig ekki. Það kom bara alls ekki til greina.“

Það er óhætt að segja að Aron hafi átt góða innkomu í liðið en hann var óhræddur við að skjóta Evrópumeistarana í kaf.

„Ég náði að stilla mig það vel inn á leikinn að þetta heppnaðist vel. Að vísu fannst mér að ég hefði getað gert betur í 2-3 skotum þar sem ég var ekki að hitta nógu vel.“

„Síðustu 2-3 vikur hef ég verið að missa aðeins tilfinninguna fyrir skotunum en það er að koma aftur núna.“

Hann segir engan vafa á því að þetta sé hans stærsti leikur á ferlinum.

„Ég hef ekki spilað stærri leik hingað til. Enda fannst mér eins og við værum á heimavelli í kvöld. Stuðningur þeirra Íslendinga sem voru í höllinni í kvöld var ótrúlegur og svo finnur maður líka fyrir því hvernig stemningin er heima. Það er því ekki annað hægt að mæta brjálaður og hungraður til leiks.“

Aron finnst að hann passi vel í íslenska landsliðshópinn þó svo að hann sé nú að taka þátt í sínu fyrsta stórmóti.

„Þetta er eitt reynslumesta liðið á mótinu og þessir strákar hafa spilað lengi saman. En mér finnst ég bara passa fullkomlega inn í þennan hóp. Það er svo mikil samheldni í liðinu og þá er Gummi líka algjör meistari í að stilla allt svona vel saman.“