Helga Þórðardóttir: Kæri kjósandi, eigum við saman að lágmarka skaðann af kreppunni

Í lang flestum löndum sem Alþjóðagjaldeyrissjóðurinn hefur stjórnað hafa ráðstafanir hans dýpkað kreppuna að mati fræðimanna (CEPR skýrslan). Þrátt fyrir það er fyrirmælum hans fylgt út í ystu æsar af valdhöfum á Íslandi. Andstaða Lilju Mósesdóttur gegn stefnu AGS er þó góðs viti.

Reykjavíkurborg mun þurfa að kljást við misgjörðir AGS á Íslandi. Þegar heimilum verður splundrað næsta vetur og fátækt eykst munu margir þurfa aðstoð borgarinnar. Frjálslyndi flokkurinn setur það sem algjört skilyrði að öllum borgurum verði tryggð framfærsla og velferðarþjónusta. Við munum aldrei sætta okkur við að ráðstafanir sjóðsins gangi svo langt.

Langbest væri að koma í veg fyrir að hugmyndafræði sjóðsins fengi sviðið í boði vinstri meirihlutans á þingi. Sem afl í borgarstjórn er ekki líklegt að Frjálslyndi flokkurinn segi Steingrími fyrir verkum. Aftur á móti viljum við með öllum tiltækum ráðum færa aukin völd til almennings. Við viljum að 10% kosningabærir Reykvíkingar geti fengið kosnigu um einstök mál. Á þann hátt gæti almenningur kosið burt rangar ákvarðanir fulltrúa sinna. Salan á HS Orku úr eigu borgarinnar á sínum tíma er gott dæmi. Annað hugsanlegt dæmi er framtíð Orkuveitu Reykjavíkur, það fyrirtæki vill Frjálslyndi flokkurinn alls ekki selja.

Afleiðingar hugmyndafræði AGS veldur eyðingu millistéttar og að sama skapi aukningu fátæktar. Einkavæðingu á öllu sem gerir þjóðina eignalausa og þar með valdalausa. Slíku þrælahaldi ætlar Frjálslyndi flokkurinn að berjast gegn. AGS stjórnar öllu á Íslandi í dag og forsenda þess að við endum ekki eins og önnur lönd sem sjóðurinn hefur stjórnað er vitundarvakning meðal fólksins. Án andstöðu almennings eru örlög okkar ráðin. Þess vegna bjóðum við okkur fram til að lágmarka skaðann af kreppunni og berjast gegn afleiðingum hennar.

Höfundur er oddviti Frjálslynda flokksins í Reykjavík