Segir áróðursmeistara Björgólfs „þræða nýjar víddir“

Bæði Ólafur Ragnar Grímsson, forseti Íslands, og Róbert Wessman, fyrrverandi forstjóri Actavis, hafna staðhæfingum Björgólfs Thors sem hann setur fram á vefsíðu sinni BTB.is. Róbert segir að Björólfur sé að þræða nýjar víddir til að hreinsa skaðað orðspor sitt á vefsíðunni og leiti að blórabögglum fyrir því sem hefur misheppnast í hans fjárfestingum.

Eins og fréttastofa hefur greint frá kemur fram á nýrri vefsíðu Björgólfs Thors Björgólfssonar, BTB.is, að Björgólfur Thor hafi fengið símtal frá Ólafi Ragnari Grímssyni rétt fyrir hrunið, þar sem forsetinn hafi lagt á það áherslu að Björgólfur kæmi heim til Íslands. Björgólfur hafi jafnframt fengið svipuð skilaboð frá fleiri stjórnmálamönnum og því ákveðið að koma heim hinn 4. október 2008 og þá fyrst áttað sig á hversu slæm staðan var orðin á Íslandi.

Í samtali við Morgunblaðið í dag hafnar Ólafur Ragnar þessu og segist ekki kannast við slíkt samtal við Björgólf Thor. Forsetinn segist hafa kannað heimildir sem hann hafi undir höndum og segist ekkert sjá um samtöl við Björgólf Thor þessa daga.

Á vefsíðu Björgólfs Thors heldur hann því einnig fram að hann hafi þurft að víkja Róberti Wessman úr starfi forstjóra Actavis þar sem áætlanir um rekstur Actavis hafi engan veginn staðist. Þá rekur hann ýmislegt sem miður hafi farið í rekstrinum, hluti sem hann hafi ekki komist að fyrr en félagið var skráð af markaði.

Róbert Wessman sendi í gærkvöldi frá sér yfirlýsingu vegna skrifa Björgólfs og segir að ummæli hans dæmi sig sjálf sem marklaus. Við yfirtöku Novators á Actavis hafi félagið verið kæft í skuldum sem hafi íþyngt rekstur þess verulega. Við afskráningu Actavis hafi Róbert haft hug á því að snúa sér alfarið að eigin fjárfestingum. Þá hafi lýst því yfir við Björgólf að hann hefði ekki áhuga á því að starfa frekar með honum af ástæðum sem hann vill ekki tíunda frekar. Róbert segir að með vefsíðunni sé Björgólfur að leggja megináherslu á að finna blóraböggla fyrir því sem miður hafi farið í fjárfestingum hans og að fjölmiðla- og áróðursmeistarar hans rói nú öllum árum að því að hreinsa skaðað orðspor hans og „þræði nýjar víddir í þeim efnum." Hann skorar því á fjölmiðlamenn að skoða yfirlýsingar Björgólfs með gagnrýnum augum.

Ragnhildur Sverrisdóttir, talsmaður Björgólfs, sagði í samtali við fréttastofu að yfirlýsingu Róberts yrði svarað á vefsíðunni. Þá sagði hún að Róbert væri nú í samkeppni við Björgólf og Actavis sem hluthafi í lyfjafyrirtækinu Alvogen og skoða þyrfti yfirlýsingar hans í því ljósi.