Raggi Bjarna og Þorgeir í Sólheimakirkju

Komið er að lokum Menningarveislu Sólheima í Grímsnesi og af því tilefni verður mikið um að vera um helgina.

Við verslunina Völu verður lífrænt markaðstorg opnað klukkan 12 á hádegi á morgun laugardag. 

Þar verða á boðstólum ferskar lífrænar afurðir frá gróðurhúsum, bakaríi og matvinnslu Sólheima auk lífrænna plantna og muna frá vinnustofum.

Sólheimakórinn treður upp með reglulegu millibili við lífræna markaðstorgið. Skátar úr skátafélagi Sólheima munu aðstoða og leiðbeina gestum og gangandi.

Klukkan tvö verða tónleikar í Sólheimakirkju með þeim Ragnari Bjarnasyni og Þorgeiri Ástvaldssyni.

Þar á eftir munu þeir Beggi og Pacas bjóða upp á rétti unna úr afurðum frá Sólheimum í kaffihúsinu Grænu könnunni.