Miðbaugsmaddaman með allt að tólf milljónir á mánuði

Vændiskonan Catalina Ncogo þénaði allt að tólf milljónir króna á mánuði samkvæmt öðrum höfundi bókarinnar Hið svarta man, eftir Þórarin Þórarinsson og Jakob Bjarnar Bjarnason.

Samkvæmt Þórarni þá gaf Catalina þær upplýsingar við yfirheyrslur hjá lögreglunni, eftir að hún var handtekin vegna vændis, að hún þénaði tólf milljónir á mánuði. Þá sagði hún í yfirheyrslunum að hún hefði þénað um tvö hundruð þúsund krónur á dag.

Lögreglan á þá að hafa bent henni á að tölurnar stemmdu ekki. Hún væri samkvæmt framburði sínum með sex milljónir í mánaðartekjur.

Sjálfur segir Þórarinn telja að heildarupphæðin hefði getað verið rétt, en mismunurinn væri þá hugsanlega tekjur komnar frá vændiskonum sem störfuðu fyrir Catalinu. Því væri óhætt að segja að mánaðartekjur Catalinu hefðu verið á bilinu sex til tólf milljónir á mánuði.

Þórarinn segir að Catalina hafi afskrifað þetta misræmi léttilega og sagt: Mín sterka hlið var aldrei reikningur.

Hitt er þó ljóst að upphæðin er gífurlega há. Þórarinn segir vændiskonurnar sem seldu líkama sína hafa fengið greiddar 20 til 25 þúsund krónur í hvert skiptið.

Sé gert ráð fyrir að hún hafi verið með tólf milljónir á mánuði og að skiptið hafi kostað 25 þúsund krónur, þá þjónustuðu vændiskonurnar karlmenn 480 sinnum á mánuði. Það gera um fimmtán karlmenn á dag.

Þórarinn tekur hinsvegar fram að inni í þessu sé mismunandi kostnaður. Meðal annars hafi Catalina fengið greiddar háar fjárhæðir fyrir að fara erlendis með karlmönnum auk annars kostnaðar. Því gefi útreikningurinn ekki endilega rétta mynd af hinum iðnu vændiskonum.

Það er hinsvegar skýrt að Catalina var hálaunuð og hefði getað borið höfuðið hátt á meðal hæst launuðust forstjóra Íslands á þeim tíma.

Þess ber varla að geta að Catalina fékk ávallt greitt svart fyrir þjónustu sína og vændiskvenna sem hún gerði út.