Hodgson: Vondur dagur á skrifstofunni

Roy Hodgson, stjóri Liverpool, sagði óhætt að segja að það hafi gengið illa í vinnunni hjá honum í kvöld.

Liverpool tapaði á heimavelli í kvöld fyrir botnliði Wolves, 1-0. Liðið heldur inn í nýja árið í tólfta sæti ensku úrvalsdeildarinnar.

„Því miður var þetta virkilega slæmur dagur á skrifstofunni," sagði Hodgson við enska fjölmiðla eftir leikinn.

„Það gekk ekki mikið okkur í hag í dag. Leikmenn reyndu að halda áfram og sinntu sinni vinnu eins vel og þeir gátu. En tæknilega séð vorum við langt frá okkar besta í kvöld."

„Hraðinn í leiknum var langt frá því sem við viljum hafa hann. Þess vegna töpuðum við leiknum. Ég held reyndar að við vorum svolítið óheppnir að tapa og ég tel að 0-0 hefðu verið sanngjörn úrslit."

„En svona er þetta. Þeir voru heppnir og náðu að skora. Við töpuðum öllum þremur stigunum og stuðningsmenn okkar urðu fyrir vonbrigðum enn og aftur."