Kaupþingsstjórar íhuga að greiða sex milljóna króna sekt

Breska fjármálaeftirlitið hefur boðið fyrrverandi æðstu stjórnendum Kaupþings samstæðunnar sættir vegna hruns Kaupþings. Þetta er fullyrt á vef breska blaðsins Telegraph í kvöld.

Blaðið segir að þeim Sigurði Einarssyni, fyrrverandi stjórnarformanni Kaupþings, og Hreiðari Má Sigurðssyni, fyrrverandi forstjóra bankans, hafi verið boðið að greiða 35 þúsund sterlingspunda sekt. Upphæð sem nemur um 6 milljónum króna. Með því gætu þeir öðlast friðhelgi gagnvart frekari aðgerðum breska fjármálaeftirlitsins gegn sér.

Daily Telegraph segir að þeir Hreiðar og Sigurður séu enn að velta fyrir sér hvort þeir eigi að greiða sektina. Hins vegar sé talið líklegast að þeir muni hafna boðinu og taka slaginn gegn breska fjármálaeftirlitinu. „Þeir telja sig báðir vera fullkomlega saklausa," segir heimildarmaður Telegraph.

Telegraph segir að auk rannsóknar breska fjármálaeftirlitsins sé efnahagsbrotadeild bresku lögreglunnar og íslensk yfirvöld að rannsaka hvort fyrrverandi stjórnendur Kaupþings hafi gerst sekir um markaðsmisnotkun og óeðlilega há lán til aðila tengdum bankanum.

Hreiðar Már fullyrti í bréfi sem hann sendi Jóhönnu Sigurðardóttur forsætisráðherra í lok september, þar sem að hann gerði grein fyrir framvindu á rannsókn fjármálaeftirlitsins, að hann myndi ekki greiða sektina.