Krefja fjármögnunarfyrirtæki um aðgerðir

Samtök iðnaðarins hafa sent fjármögnunarfyrirtækjum opið bréf þar sem krafist er aðgerða vegna dóms Hæstaréttar í gengismálinu svokallaða. Samtökin gera þá kröfu að höfuðstólar verði lækkaðir eða lán greidd til baka.

„Samtök iðnaðarins, fyrir hönd félagsmanna sinna, gera þá kröfu að fjármögnunar­fyrirtækin, Lýsing, SP-fjármögnun, Avant og eftir atvikum önnur fjármálafyrirtæki greiði til baka eða lækki höfuðstól þeirra lánasamninga, sem voru gengistryggðir með þeim hætti sem Hæstiréttur hefur dæmt ólögmætt," segir í bréfi samtakanna.

Þar segir jafnframt að samtökin krefjist þess að fyrirtækin geri félagsmönnum Samtaka iðnaðarins grein fyrir því á hvern hátt þau hyggist bæta þeim tjónið sem félagsmenn hafa orðið vegna þessara lánasamninga.

Samtökin gefa fjármögnunarfyrirtækjunum viku í frest til að leggja fram viðbragðsáætlun vegna dómsins.