Lögregla lokaði spilavíti í miðborginni

Lögregla fór um helgina inn í spilavíti í miðborg Reykjavíkur og stöðvaði fjárhættuspil sem þar var í gangi. Í spilavítinu er jafnan spilað upp á hundruðir þúsunda króna.

Í húsi við Ingólfstorg hefur um nokkurt skeið verið rekið eins konar spilavíti eða spilaklúbbur. Klúbburinn heitir Casa og þar er spilaður póker upp á peninga. Starfsemin á Casa hefur að mestu verið látin óáreitt en um síðustu helgi varð breyting á því.

Þá fóru sjö eða átta lögreglumenn inn í klúbbinn þar sem 5-6 karlmenn sátu við eitt borðið og spiluðu póker, en lögregla stöðvaði þá og lagði hald á reiðufé sem spilað var um.

Í þessu tilfelli var ekki mikið fé haldlagt. Líklega eitthvað í kring um 60 þúsund krónur. Heimildir fréttastofu herma hins vegar að vanalega séu allt upp í 20 manns að spila í klúbbnum. Hver þeirra greiðir að lágmarki 10 þúsund krónur til að vera með og í sumum tilfellum mun meira. Vinningsfé á slíkum kvöldum skiptir því stundum hundruðum þúsunda króna.

Forsvarsmaður klúbbsins fjármagnar svo starfsemina með því að taka 10% hlut af vinningsfé. Hann vildi ekki veita fréttastofu viðtal í dag en þær upplýsingar fengust hjá lögreglu að hann yrði kallaður til skýrslutöku fljótlega.

Þess má geta að einn þeirra sem sótt hefur spilaklúbbinn Casa við Ingólfstorg er varaformaður framsóknarflokkssins, Birkir Jón Jónsson, en hann er talsmaður þess að póker verði lögleiddur hér á landi. Að sögn Birkis hefur hann sótt klúbbinn í eitt skipti.