Lifandi hákarl skilinn eftir á tröppum dagblaðs

Lögregla í Warrnambool í suðausturhluta Viktoríufylkis í Ástralíu klórar sér nú í höfðinu yfir því furðulega uppátæki óþekkts eða óþekktra aðila að skilja eftir lifandi hákarl við útidyr Standard-dagblaðsins þar í bænum í gærmorgun.

Dýrið var 70 cm að lengd og af tegundinni Port Jackson en þessi hákarlategund dregur nafn sitt af samnefndum bæ í Ástralíu og nær latneska heitið meira segja yfir það líka, heterodontus portusjacksoni.

Lögregluþjónninn Jarrod Dwyer kom á vettvang og skvetti vatni á hákarlinn til að kanna lífsmörk. Dýrið tók þá að bægslast um svo Dwyer hóf þegar lífgunartilraunir. Hann hljóp yfir á McDonald´s og fékk þar fötu með vatni. Svo skellti hann Jackson-hákarlinum í fötuna, ók í snarhasti með hann til sjávar og varpaði honum út í.

Þetta virtist duga til þar sem hákarlinn tók að svamla um hinn ánægðasti. Hvorki lögreglan né ritstjórn Standard átta sig á hvaða duldi boðskapur bjó að baki þessu sérkennilega uppátæki.