Neytendastofa leggur dagsektir á Og fjarskipti

Neytendastofa hefur lagt dagsektir á Og fjarskipti ehf. (Vodafone) þar sem fyrirtækið hefur ekki farið að ákvörðun Neytendastofu frá 30. janúar 2009.

Í umfjöllun um málið á vefsíðu Neytendastofu segir að með ákvörðuninni þann 30. janúar 2009, var Og fjarskiptum bönnuð notkun orðsins „fríkeypis" fyrir þjónustu sem greiða þarf fyrir. Var Og fjarskiptum gefinn frestur í eina viku til að fara að ákvörðuninni.

Þar sem Og fjarskipti höfðu ekki farið að ákvörðun Neytendastofu, m.a. með því að hafa ekki fjarlægt orðið af vefsíðu sinni, lagði Neytendastofa á Og fjarskipti dagsektir að fjárhæð kr. 50.000- á dag að einni viku liðinni þar til farið yrði að ákvörðun stofnunarinnar.