Gunnar í Krossinum kaupir skemmtibát á milljónir króna

Gunnar Þorsteinsson, oft kenndur við trúfélagið Krossinn, festi nýverið kaup á forláta skemmtibát í félagi með nokkrum vinum sínum. Gunnar segir að bátinn eigi að nota til skemmtisiglinga og sjóstangveiða en Gunnar hefur átt nokkra báta í gegnum tíðina.

Kaupverðið er einkamál en samkvæmt heimildum fréttastofu var ásett verð 14 milljónir. Seljandi var starfsmannafélag Samskip.

Gunnar og félagar hans eiga enn eftir að velja nafn á bátinn en það mun að öllum líkindum verða úr biblíunni.

„Það eru tvö nöfn sem koma til greina. En strákarnir ætla að leyfa mér að ráða þessu," segir Gunnar Þorsteinsson í Krossinum.