Tveir flýðu og tveir veiddu innan þjóðgarðsins

Tveir veiðimenn lögðu á flótta þegar lögreglan á Selfossi nálgaðist þá á sunnudaginn. Lögreglan gerir ráð fyrir að mennirnir hafi ekki verið með góða samvisku og rannsakar málið.

Lögreglan á Selfossi er búinn að vera með öflugt eftirlit með skotveiðimönnum á svæðinu á milli Þingvalla og Laugarvatns. Lögreglan ræddi við um eitt hundrað veiðimenn á þessum slóðum en rjúpnaveiðitímabilið er í hámarki.

Allir, utan fimm, voru til fyrirmyndar og með allt sitt á hreinu að sögn lögreglunnar. Tveir voru innan þjóðgarðs á Þingvöllum.

Hald var lagt á skotvopn þeirra og þá bráð sem þeir höfðu komist yfir. Mál tvímenninganna mun verða rannsakað frekar. Þrír skotveiðimenn voru ekki með veiðikort meðferðis. Skotvopn þeirra voru því haldlögð.