Viðskiptaráðherra hefur ekkert rætt við skilanefnd Gamla Landsbankans

„Ég hef ekkert náð að ræða þetta við skilanefndina og hef ekkert beint eftirlit með skilanefndinni," segir Gylfi Magnússon viðskiptaráðherra um sölu skilanefndarinnar á 2,6% hlut í Byr sparisjóði sem hafði verið fyrirhuguð. Gylfi bendir á að hann hafi ekki beint eftirlit með skilanefndinni, það heyri undir Fjármálaeftirlitið. Hann treysti Fjármálaeftirlitinu til að fara með forræði í þessu máli.

Gylfi segist ekki hafa neitt í höndunum um málið annað en það sem hafi komið fram í fjölmiðlum. Gylfi tengir málið við aðalfund Byrs sparisjóðs sem fer fram í dag. „Það er augljóslega einhver hasar út af þessum aðalfundi og ég ætla ekki að blanda mér í þær deilur. Ekki nema að það sé rík ástæða til," segir Gylfi.