AFL stefnir Landsvaka

AFL Starfsgreinafélag samþykkti í kvöld að stefna sjóðsstjórnum Landsvaka, er önnuðust upplýsingagjöf til félagsins og fóru með fjármuni þess, til greiðslu bóta vegna þeirra fjármuna er félagið tapaði við uppgjör sjóðsins, samkvæmt tilkynningu frá sjóðnum.

Þar segir einnig: Grundvöllur málshöfðunar er að félagið telur að umræddir sjóðsstjórar hafi blekkt félagið til áframhaldandi viðskipta þegar ljóst var að eignasafn sjóðsins var ekki í samræmi við lýsingar og sjóðurinn stefndi í óefni. Ennfremur telur félagið að verulega óeðlilegt útstreymi hafi verið síðustu fjóra daga í starfsrækslu sjóðins og ljóst að innherjaupplýsingar hafi haft áhrif sem juku enn á tap annarra.

Tilkynningin má lesa í heild sinni hér fyrir neðan:

Eftirfarandi samþykkt var gerð á stjórnarfundi AFLs Starfsgreinafélags sem var að ljúka. Skv. samþykktinni hyggst félagið stefna sjóðsstjórnum Landsvaka, er önnuðust upplýsingagjöf til félagsins og fóru með fjármuni þess, til greiðslu bóta vegna þeirra fjármuna er félagið tapaði við uppgjör sjóðsins.

Grundvöllur málshöfðunar er að félagið telur að umræddir sjóðsstjórar hafi blekkt félagið til áframhaldandi viðskipta þegar ljóst var að eignasafn sjóðsins var ekki í samræmi við lýsingar og sjóðurinn stefndi í óefni. Ennfremur telur félagið að verulega óeðlilegt útstreymi hafi verið síðustu fjóra daga í starfsrækslu sjóðins og ljóst að innherjaupplýsingar hafi haft áhrif sem juku enn á tap annarra.

Grundvöllur málshöfðunarinnar eru gögn er AFL Starfsgreinafélag hefur fengið afhent frá Landsbankanum í kjölfar málshöfðunar félagsins á hendur bankanum til að fá afhentar upplýsingar um samsetningu eigna sjóðsins vikurnar fyrir hrun. Þær upplýsingar fengust afhentar fyrir skömmu.