Ráðstöfunartekjur jukust um hátt í 20% í fyrra

Ráðstöfunartekjur heimilageirans eru taldar hafa aukist um 18% í fyrra frá árinu þar á undan. Ráðstöfunartekjur á mann jukust um 15,1% milli ára og kaupmáttur ráðstöfunartekna á mann um 2,4%.

Heildartekjur heimilageirans eru taldar hafa aukist um 14,5% frá fyrra ári og heildareigna- og tilfærsluútgjöld um 9,3%. Ráðstöfunartekjur heimilanna í heild hafa þar með aukist að meðaltali um 8,9% á ári frá árinu 1994. Að teknu tilliti til verðlagsbreytinga og aukningar mannfjölda jókst kaupmáttur á mann um tæp 82% frá árinu 1994 til 2008, eða að meðaltali um 4,4% á ári.

Þær tölur sem hér eru birtar eru frá Hagstofunni og eru þær að mestu unnar út frá skattframtölum einstaklinga. Þar af leiðir að tölur fyrir árið 2009 eru ekki tiltækar.