Aflaverðmætið jókst um tæpa 11 milljarða kr.

Aflaverðmæti íslenskra skipa nam 79,7 milljörðum króna á fyrstu tíu mánuðum ársins 2008 samanborið við 68,9 milljarða á sama tímabili árið 2007. Aflaverðmæti hefur aukist um 10,7 milljarða eða 15,6% á milli ára. Aflaverðmæti í október nam 9,3 milljörðum miðað við 6,1 milljarð í október 2007.

Greint er frá þessu á vefsíðu Hagstofunnar. Aflaverðmæti botnfisks frá janúar til október 2008 nam 56,6 milljörðum og jókst um 9,6% miðað við sama tímabili árið 2007.

Verðmæti flatfiskafla janúar til október nam 4,9 milljörðum og jókst um 29,6% frá fyrra ári. Aflaverðmæti uppsjávarafla nam 17,1 milljarði sem er 35,2% aukning miðað við fyrstu tíu mánuði ársins 2007.

Verðmæti afla, sem seldur er í beinni sölu útgerða til vinnslu innanlands nam 30,3 milljörðum króna sem er aukning um 6,3% frá fyrra ári. Verðmæti afla sem keyptur er á markaði til vinnslu innanlands dróst saman um 1,7% og nam 10,9 milljörðum fyrstu tíu mánuði ársins.

Aflaverðmæti sjófrystingar nam 26 milljörðum, jókst um 27,7% og verðmæti afla sem fluttur er út óunninn nam 9,8 milljörðum sem er 36,1% aukning frá sama tímabili árið 2007.