Pee Wee snýr aftur

Það versta sem getur hent barnastjörnu er sennilega að vera gripinn af löggunni með allt niður um sig í klámbíói. Einmitt þessu lenti Paul Reubens í árið 1991.

Hann hafði slegið í gegn snemma á níunda áratugnum í hlutverki Pee Wee Hermans, bæði í vinsælum sjónvarpsþáttum og í kvikmyndinni Pee Wee‘s Big Adventure, sem Tim Burton leikstýrði 1985. Eftir atvikið hrundi heimur Pauls, þættirnir voru teknir af dagskrá og leikfangabúðir fjarlægðu Pee Wee Herman dót. Atvikið lagðist þungt á leikarann og hann fór huldu höfði árum saman. Nú er hins vegar allt á uppleið og Pee Wee hefur birst hjá bæði Leno og Conan.

Með hjálp förðunarsnillinga lítur hann ekki út fyrir að hafa elst um einn dag. Í janúar fer sýningin The Pee Wee Herman Show á svið í Los Angeles og í undirbúningi er ný kvikmynd um ævintýri grallarans.- drg