Ari Edwald: Sala á Senu ekki í uppnámi

Ari Edwald, stjórnarformaður Íslenskrar afþreyingar, segir það af og frá að salan á Senu sé í uppnámi vegna 750 milljóna króna kröfu 365 miðla á hendur Senu. Hann segir kröfuna ekki koma Senu við.

Eins og Vísir greindi frá fyrr í dag varð krafan til þegar félag í eigu Jóns Ásgeirs Jóhannessonar keypti 365 miðla út úr 365 hf. fyrir um sex milljarða. Nafni 365 hf var síðan breytt í Íslenska afþreyingu undir hvers hatti Sena og EFG voru. Heimildir Vísis hermdu að salan á Senu væri í uppnámi en Ari þvertekur fyrir það.

Hann segir að um sé að ræða mál sem varði eingöngu Íslenska afþreyingu og 365 miðla en komi Senu ekkert við.