Leggja áherslu á handþvott nema

Heilbrigði Allt skólastarf í landinu getur hafist með eðlilegum hætti á næstunni þrátt fyrir heims-faraldur svínaflensu en 112 hafa nú greinst með flensuna. Þetta kemur fram í tilkynningu frá landlæknisembættinu.

Þótti nauðsynlegt að taka þetta sérstaklega fram vegna fyrirspurna frá skólastjórnendum, foreldrafélögum og fleirum um möguleg áhrif inflúensufaraldursins á starfsemi skóla á komandi haustönn.

Sóttvarnarlæknir áréttar í tilkynningunni að inflúensufaraldurinn sé tiltölulega vægur. Unnið er að viðbragðsáætlun í skólum landsins og eru skólastjórnendur hvattir til að halda hreinlætismálum á lofti og þá sérstaklega handþvotti. Ef nemandi veikist, þannig að einkenni benda til inflúensu er honum ráðlagt að halda sig heima í sjö daga frá upphafi veikinda.

Af þeim 112 svínaflensutilfellum sem greinst hafa hér á landi er 61 karl og 51 kona. Flestir eru á aldrinum 15-29 ára. Framvegis verða tölulegar upplýsingar um inflúensufaraldurinn hér á landi uppfærðar vikulega á heimasíðunni www.influensa.is en hingað til hafa tilkynningar borist þrisvar til fjórum sinnum í viku.