Opið bréf til stúdenta við HÍ

Núverandi meirihluti hefur ætíð verið yfirlýsingaglaður og skáldlegur um stefnu Röskvu þegar kemur að gjaldskyldu í bílastæði við HÍ. Fyrst í aðdraganda kosninga þegar Vaka lýsti því yfir að Röskva vildi gjaldskyldu í öll bílastæði á háskólasvæðinu og nú í umræðunni sem hefur myndast um málið þar sem ýjað er að því að báðar fylkingar telji þetta eitt helsta hagsmunamál stúdenta. Því telur Röskva nauðsynlegt að koma skoðun sinni á framfæri í eitt skipti fyrir öll.

Í fyrsta lagi er yfirlýst stefna Röskvu sú að án bætts aðgengis gangandi og hjólandi nemenda að skólanum, auk bættra almenningssamgangna, sé gjaldskylda á háskólasvæðinu óásættanleg. Aftur á móti erum við ósammála Vöku um að það sé eitt stærsta hagsmunamál stúdenta að berjast gegn upptöku gjaldskyldu í 5% bílastæða við Háskólann. Minni mál mega vitanlega ekki gleymast en þau mega aldrei njóta forgangs á kostnað stærri mála á borð við gjaldfrjálsar samgöngur, jafnrétti og lánasjóðsmál.

Í öðru lagi viljum við að það komi skýrt fram að það eru starfsmenn skrifstofu Stúdentaráðs sem sjá um póstlista ráðsins. Sú ákvörðun að hafna beiðni stúdents um að senda út undirskriftarsöfnun fyrir þá sem eru hlynntir gjaldtöku í bílastæði, kom því aldrei inn á borð Stúdentaráðs sem slíks. Röskva viðurkennir þessa verkaskiptingu en er mótfallin ritskoðun og geðþóttaákvörðunum. Póstlistinn á að þjóna hagsmunum allra 13.500 nemenda HÍ.

Í þriðja lagi teljum við óeðlilegt að framkvæmdastjóri SHÍ skuli ganga jafnhart fram í pólitísku máli sem þessu. Æskilegra væri að formaður eða varaformaður Stúdentaráðs svaraði fyrir stefnu ráðsins í pólitískum hitamálum en faglega ráðinn starfsmaður.

Þær rangfærslur sem framkvæmdastjóri ráðsins hefur verið uppvís að, sem og sá hroki sem skein í gegn í svari hans við bréfi stúdents við HÍ, varpa skugga á ráðið og rýra trúverðugleika þess. Það er með öllu óviðunandi að framkvæmdastjóri reyni að slá ryki í augu stúdenta með því að snúa þessu máli upp í að snúast um líkamlega hreysti nemenda en aðgengi fatlaðra mun ekki skerðast við upptöku gjaldskyldu í bílastæði. Enn verra er að hann leyfi sér að taka orð starfsmanns Háskólans úr samhengi eftir eigin geðþótta, máli sínu til stuðnings.

Það er nýlunda en um leið grafalvarlegt mál að ítrekað skuli nemendur við HÍ sjá sig knúna til að rita greinar um rangfærslur og lygar forsvarsmanna Stúdentaráðs á opinberum vettvangi.

Við vonum að starfsmenn skrifstofu ráðsins taki þessari gagnrýni með opnum hug og beini í framhaldinu sjónum að fleiri hagsmunamálum stúdenta en stöðumælum við hundrað bílastæði á háskólasvæðinu.

Höfundur er oddviti Röskvu.