Mjög mikill samdráttur í greiðslukortaveltu Íslendinga

Mjög mikill samdráttur hefur orðið í greiðslukortaveltu Íslendinga, einkum erlendis þar sem veltan hefur dregist saman um tvo þriðju í desembermánuði miðað við sama tíma í fyrra.

Fjallað er um máið í Morgunkorni grieningar Glitnis. Þar segir að mikill samdráttur í kortaveltu undanfarið er til marks um hversu hratt heimilin hafa hert beltið eftir að fjármálakreppan brast á síðasta haust. Tölur um veltu í smásöluverslun segja svipaða sögu.

Samkvæmt nýbirtum tölum Seðlabankans var heildarvelta vegna kreditkortanotkunar 20,4 milljarða kr. í desembermánuði. Reiknað á föstu gengi og verðlagi er hér um 27% samdrátt á milli ára að ræða, og athygli vekur að þegar leiðrétt er fyrir gengisbreytingum hefur erlend kreditkortavelta skroppið saman um tvo þriðju á milli ára.

Debetkortavelta minnkaði einnig verulega í desember frá sama tíma í fyrra, og nam raunbreytingin 18% í heild en 15,5% ef aðeins er litið til veltu í verslunum. Rétt er að hafa í huga að kreditkortaveltan miðast við kortatímabil en debetkortaveltan við almanaksmánuðinn.

Kortavelta gefur góða mynd af þróun einkaneyslu, og miðað við breytingar á kortaveltu undanfarna mánuði má vera ljóst að einkaneysla hefur skroppið mikið saman frá því kreppan skall á af fullum þunga. Einfalt líkan, þar sem breytingar á kreditkortaveltu auk debetkortaveltu í innlendum verslunum eru notaðar til að spá fyrir um þróun einkaneyslu, gefur þá niðurstöðu að einkaneyslan hafi minnkað um u.þ.b. fimmtung á síðasta fjórðungi nýliðins árs miðað við sama tíma árið 2007.