Tenging við Ísland hamlar viðskiptum

„Ef lagt er út í ný viðskipti, eða við fyrirtæki sem ekki þekkja til okkar, þá getur tengingin við Ísland truflað vegna orðspors landsins. Traustið er ekkert,“ segir Hafþór Hilmarsson, starfandi stjórnarformaður Avion Aircraft Trading (AAT). Orðróm um að félag hans sé flutt úr landi segir hann hins vegar orðum aukinn.

„Á Írlandi eigum við dótturfélag, sem aftur á tvær flugvélar,“ segir hann, en bætir um leið við að AAT noti nú írska dótturfélagið þegar kemur að nýjum viðskiptum. AAT, sem annast kaup, sölu og leigu fraktflugvéla, var áður hluti af Avion Group, en er nú í eigu Arctic Partners.

AAT fellur undir skilgreiningar Seðlabankans um undanþágu frá lögum um gjaldeyrishöft, enda bæði með meirihluta tekna og gjalda í erlendri mynt.

Hafþór segir félagið því ekki hyggja á flutning starfsumhverfisins vegna, en hefði félagið ekki fengið undanþágu frá lögunum er ljóst að það hefði ekki getað haldið starfseminni áfram hér á landi. Hann segir hins vegar lítið traust í alþjóðaviðskiptum og ljóst að ekki hjálpi til að segjast koma frá Íslandi í samskiptum við fyrirtæki eða fjármálastofnanir sem fyrirtækið hafi ekki átt í samskiptum við áður. „Þá er betra að nota írska dótturfélagið.“

Markaðurinn hefur hins vegar heimildir fyrir því að önnur smærri fyrirtæki sem ekki hafa fengið undanþágu frá gjaldeyrislögunum séu sum hver að hugsa sér til hreyfings.

Nýlegt dæmi er um félag sem er með þjónustustarfsemi erlendis og ætlaði í hagræðingarskyni að kaupa litla íbúð í Lundúnum vegna tíðra ferða þangað. Gjaldeyrislögin gerðu hins vegar að verkum að fyrirtækið mátti ekki taka yfir lánin sem á íbúðinni hvíldu.

Fyrirtæki í þessari stöðu, sem eru með erlenda starfsemi án þess þó að falla undir undanþáguákvæði gjaldeyrislaganna, horfa gjarnan til Írlands með mögulegan flutning í huga, þar sem aðbúnaður sé þar góður og skattaumhverfi hagkvæmt. Framkvæmdastjóri fyrirtækisins sem nefnt er hér að ofan segir að þar á bæ séu menn langþreyttir á að mega ekki haga fjárfestingum eftir eigin höfði og vera meinað að stökkva á tækifæri sem upp kunna að koma á erlendri grundu.

Gjaldeyrishöftin voru lögleidd í lok nóvember og áttu samkvæmt laganna hljóðan að gilda í tvö ár, jafnlengi og samkomulag ríkisstjórnarinnar við Alþjóðagjaldeyrissjóðinn. Seðlabankinn segir stefnt að því að afnema höftin í þrepum eftir því sem aðstæður leyfa.