Landsbankinn styrkir fjármálaráðgjöf til fólks af erlendum uppruna

Alþjóðahús og Landsbankinn hafa tekið saman höndum um að efla fjármálaráðgjöf til fólks af erlendum uppruna vegna sérstaks ástands í efnahagsmálum.

Í tilkynningu frá Landsbankanum segir að markmiðið með þessu sé að veita markvissa ráðgjöf til skjólstæðinga Alþjóðahúss sem eru í greiðsluerfiðleikum. Verkefnið sé liður í víðtækari samstarfssamningi sem Landsbankinn og Alþjóðahús hafa gert með sér.

Þá segir að Landsbankinn hafi átt í góðu samstarfi við Alþjóðahús síðustu ár og verið bakhjarl ýmissa verkefna á vegum Alþjóðahúss. Ákveðið hafi verið að endurnýja samstarfið á nýjum grunni með fjármálaráðgjöf í öndvegi.

Landsbankinn mun einnig styrkja Alþjóðahús með fjárframlagi svo unnt sé að halda uppi markvissri ráðgjafastarfsemi í höfuðstöðvum Alþjóðahúss. Starfsmenn Landsbankans munu veita ráðgjöfum Alþjóðahúss aðstoð og sömuleiðis munu starfsmenn bankans eiga kost á að sitja námskeið á vegum Alþjóðahúss.

„Á síðustu mánuðum hefur beiðnum um fjármálaráðgjöf fjölgað mikið hjá okkur í Alþjóðahúsi og því er það mjög mikilvægt að fá stuðning Landsbankans til að geta annað eftirspurn," segir Margrét Steinarsdóttir, framkvæmdastjóri Alþjóðahúss.

„Við höfum átt gott samstarf við bankann í gegnum tíðina og það er tímanna tákn að sérstakt átak í fjármálaráðgjöf verði rauði þráðurinn í samstarfinu að þessu sinni."

Í tilkynningunni segir ennfremur að Landsbankinn muni styrkja verkefni Alþjóðahúss til að auka fjölmenningarfærni ungs fólks og vinna kennsluefni um fordómafræðslu.

Markmiðið sé að ná til barna á grunnskólaaldri, unglinga og fullorðinna, með kennsluefni um fordóma, umburðarlyndi og fjölmenningu.

Leiðbeinendur á vegum Alþjóðahúss munu heimsækja nemendur í efri bekkjum grunnskóla og vekja nemendur til umhugsunar um kynþáttafordóma.