Græn orka gæti bjargað Íslandi

„Menn eru farnir að borga aukalega fyrir grænt rafmagn. Það er skortur á grænni orku austan og vestanhafs þannig að það er mikill möguleiki fyrir okkur Íslendinga að nýta auðlindir okkar til útflutnings," segir Friðrik Hansen Guðmundsson, verkfræðingur, í viðtali við Vísi en hann telur að ríkið geti haft umtalsverðar tekjur af sölu á rafmagni í samstarfi við einkaaðila í gegnum sæstreng.

Hann telur að Íslendingar eigi að semja við Breta og Hollendinga um sölu á raforku. „Ef þeir vilja að við samþykkjum þennan Icesave samning sem nú liggur fyrir Alþingi, þá legg ég til að þeir láni okkur 500 milljarða króna til að setja upp vindmyllugarða, sólarpanelekrur, vatnsaflsvirkjanir, jarðhitavirkjanir og gufuaflsvirkjanir. Ásamt því verði lagðir tveir 500 MW sæstrengir, annar til Hollands og hinn til Skotlands. Ef þeir vilja ekki lána okkur fyrir þessum framkvæmdum þá munum við ekki borga af Icesave láninu þar sem við höfum hreinlega ekki fjármagn til þess. Það verða að koma nýjar fjárfestingar inn í landið sem skapa tækifæri til að nýta náttúruauðlindir okkar ef við eigum að geta borgað af láninu," segir Friðrik.

Hann telur að sala rafmagns í gegnum sæstreng sé örugg, einföld og fljótleg leið sem myndi hafa það í för með sér að afborganir af Icesave láninu myndu ekki íþyngja almenningi á Íslandi. Þvert á móti yrði Icesave okkur happadráttur, ef þessi leið yrði farin.

„Orkan sem tapast í gegnum sæstrenginn er miklu minni en hingað til hefur verið áætlað. Nú er gert ráð fyrir því að um 10% orkunnar tapist á leið sinni yfir hafið. Síðan væri hægt að semja við Breta og Hollendinga um að ríkið fengi einhvern hundraðshluta af endanlegu söluverði rafmagnsins erlendis," segir Friðrik og bendir á að líftími umræddra sæstrengja sé í kringum 20 ár.

Friðrik átti fund með Steingrími J. Sigfússyni, fjármálaráðherra, varðandi málið og var fjármálaráðherrann afar jákvæður. Sagðist hann ætla að skoða málið frekar að sögn Friðriks.

Skrif Friðriks um málið má nálgast hér.