Styðjast við upptökur vegna rannnsóknar á gjaldeyrisbraski

Upptökur af símtölum starfsmanna eru meðal gagna sem Fjármálaeftirlitið hefur fengið frá fjármálafyrirtækjum, við rannsókn mála. Þrír menn sem eru til rannsóknar hjá eftirlitinu, vegna gjaldeyrisbrasks, stofnuðu fyrirtæki í Lúxemborg, meðan þeir voru enn að störfum hjá Askar Capital.

Þrír karlmen voru leystir frá störfum hjá fjármálafyrirtækinu Askar Capital undir lok mars á þessu ári. Ástæðan var grunur um brot á lögum um gjaldeyrisviðskipti; og raunar, eftir því sem fréttastofa kemst næst; hugsanleg brot á hegningarlögum. Mál þeirra eru til rannsóknar hjá Fjármálaeftirlitinu.

Gjaldeyrisbrask mannanna virðist hafa hafist um mánaðamótin nóvember/desember í fyrra. Þeir eru grunaðir um að hafa notað nafn Askar Capital í viðskiptum sínum. Þeireir undirbjuggu á sama tíma eigin rekstur. Þeir stofnuðu í byrjun desember, meðan þeir störfuðu enn hjá Askar, félagið Capital Path Partners.

Samkvæmt skráningu í Lögbirtingablaði Lúxemborgar, stofnuðu þeir einnig þar sérstakt félag 16. desember, með sama heiti. Það virðist vera svonefnt skúffufyrirtæki; það er til húsa á sama stað og lögfræðistofa nokkur þarna í Lúx og tveir af þremur stjórnarmönnum eru lögmenn á stofunni.

Gjaldeyrisbrask virðist vera orðinn nokkur atvinnuvegur. Aðstoðarseðlabankastjóri sagði nýlega að ærinn fjárhagslegur hvati væri fyrir suma að fara í kringum gjaldeyrishöftin. Afleiðingar þess eru þó alvarlegar því ekki skilar sér sá gjaldeyrir sem hingað á að koma.

Fréttastofu er kunnugt um að meðal gagna sem Fjármálaeftirlitið skoðar vegna þessa Askar-málsins, séu upptökur eða uppskriftir af símtölum sem mennirnir áttu, úr borðsíma á skrifstofu sinni. Eftir því sem næst verður komist eru slík gögn til rannsóknar í fleiri málum sem Fjármálaeftirlitið og raunar einnig sérstakur saksóknari bankahrunsins og saksóknari efnahagsbrotadeildar hafa með höndum.

Heimildarmenn fréttastofa benda meðal annars á að upptökur símtala séu í mörgum tilvikum heimildir um tilurð tiltekinna viðskipta. Þá séu símtöl í sumum tilvikum höfuðsönnunargögn í málum sem varða markaðsmisnotkun og innherjasvik.