Telur ólíklegt að vaxtagreiðslur skýri veikingu krónunnar

Hagfræðideild Landsbankans telur ólíklegt að vaxtagreiðslur til erlendra eigenda ríkisbréfa í þessum mánuði skýri veikingu krónunnar. Þetta kemur fram í Hagsjá deildarinnar.

Á morgun föstudag fer fram lokagjalddagi á RIKB090612, en markaðsvirði þess flokks er rúmir 70 milljarðar kr. Bréfið ber 8,5% vexti og því má áætla að rúmlega 6 milljarða kr. vaxtagreiðsla verði greidd út í lok vikunnar. Samkvæmt upplýsingum frá Lánamálum ríkisins var um 80% af flokknum í eigu útlendinga í lok febrúar síðastliðnum.

Áfallna vexti af skuldabréfum má yfirfæra frá þeim degi er vaxtagreiðsla fer fram en nýlega áréttaði Seðlabankinn að gjaldeyrisreglur heimiluðu aðeins að yfirfæra vexti í hlutfalli við þann tíma sem viðkomandi aðili hefur átt skuldabréfið. Með þessu er komið í veg fyrir að erlendir aðilar geti keypt þá ríkisbréfaflokka sem eru með vaxtagjalddaga á næstunni til þess að geta flutt út alla vaxtagreiðsluna.

Þessu til viðbótar má áætla að um rúmlega hálfur milljarður króna falli til í vaxtagreiðslur af innstæðubréfum, SI 090624, en útistandandi í dag alls 67 milljarðar kr í þessum flokk. Erlendir aðilar eiga langstærstan hluta þessara innstæðubréfa. Þá eru ótaldir vextir af innlendum bankainnistæðum erlendra aðila en þær hafa að öllum líkindum vaxið hratt undanfarið samhliða því að jöklabréf hafa fallið á gjalddaga og höfuðstólsgreiðslunni verið komið fyrir í skammtímaávöxtun.

Tveir jöklabréfagjalddagar eru í júní, annar þeirra var að upphæð 10 milljarðar kr. þann 2. júní en sá seinni, 4 milljarðar kr., er á sjálfan þjóðhátíðardaginn, 17. júní. Í tengslum við þessa tvo gjalddaga má búast við um 1,5 milljarða kr. vaxtagreiðslu. En samkvæmt túlkun Seðlabankans á gjaldeyrislögunum er ekki heimilt að skipta vöxtum af erlendum skuldabréfum sem gefin eru út af erlendum aðilum í krónum, þ.e. jöklabréfum, yfir í erlendan gjaldeyri.

„Þegar upp er staðið er því útlit fyrir að aðeins sé heimilt að skipta takmörkuðum hluta ofantalinna vaxtagreiðsla yfir í erlenda mynt og því ólíklegt að þessir gjalddagar skýri veikingu krónunnar síðustu daga," segir í Hagsjánni. Í gær veiktist krónan um 0,8% á móti evrunni og nemur veiking þessarar viku því alls 3,1%. Evran kostaði í lok dags 180 kr. eftir að hafa farið hæst í 182 innan dagsins.

Evran hefur ekki verið dýrari frá því í byrjun desember þegar hún fór hæst í um 187 kr., en hún hefur aldrei verið dýrari. Svo virðist sem aukin vantrú sé á krónunni og að enn sé komin upp sú staða að gjaldeyrir sé ekki að skila sér að fullu inn á markaðinn. Ljóst er á meðan að útstreymi gjaldeyris er meira en innstreymi þá er hætt við að krónan haldi áfram að gefa eftir.