Ritstjóri Morgunblaðsins enn eigandi Viðskiptablaðsins

Haraldur Johannessen nýráðinn ritstjóri Morgunblaðsins er enn eigandi Viðskiptablaðsins sem hann ritstýrði áður. Samkvæmt nýjustu upplýsingum frá Lánstrausti er Útgáfufélagið Myllusetur í 100% eigu Haraldar en það félag keypti Viðskiptablaðið í nóvember á síðasta ári af félaginu Framtíðarsýn sem átti blaðið áður.

Nokkur leynd hefur verið yfir því hverjir eigi Myllusetur og var athafnamaðurinn Róbert Wessmann meðal annars sagður eiga hlut í því´. Hann hefur hinsvegar neitað að eiga nokkuð í félaginu.

Þá vakti athygli þegar Gísli Freyr Valdórsson blaðamaður á Viðskiptalaðinu keypti allt hlutafé í Framtíðarsýn á eina krónu. Hann tók við sem stjórnarformaður í félaginu í kjölfarið eftir að félagið fór í greiðslustöðvun. Viku síðar seldi hann síðan allar eignir félagsins til Mylluseturs gegn yfirtöku á hluta af skuldum félagsins. Framtíðarsýn var síðan tekið til gjaldþrotaskipta.

Vísir hefur ítrekað reynt að ná tali af Haraldi í dag en án árangurs. Sigurður Már Jónsson núverandi ritstjóri Viðskiptablaðsins benti á nýráðinn framkvæmdarstjóra blaðsins Pétur Árna Jónsson þegar hann var spurður út í hver ætti blaðið. Ekki hefur heldur náðst í Pétur Árna þrátt fyrir ítrekaðar tilraunir í dag en hann situr í stjórn Mylluseturs ásamt Haraldi.