Ríkisstjórn á réttri leið

Ríkisstjórn Samfylkingar og Vinstri grænna hefur náð miklum árangri á stuttum tíma, þrátt fyrir að vera í minnihuta á þingi. Flokkarnir starfa augljóslega vel saman. Stjórnin hefur náð tökum á hinu erfiða ástandi, gert nauðsynlegar breytingar í lykilstofnunum, komið uppgjörsmálum vegna hrunsins í trausta farvegi og náð þeim árangri við útfærslu endurreisnaráætlunar AGS að nú hillir undir að bankarnir fari að geta starfað eðlilega fyrir atvinnulíf og heimili. Margvísleg mildandi úrræði fyrir heimili og fyrirtæki hafa verið innleidd þrátt fyrir þröngan fjárhag. Fleiri úrræði munu þurfa að fylgja. Fólk finnur að málin eru að fara í rétta átt.

Samfylkingin og Vinstri grænir eiga það sameiginlegt að aðhyllast lýðræðislega jafnaðarstefnu og norræna velferðarsamfélagið. Það er mikilvægasti grunnur samstarfs þeirra til lengri tíma. Það voru einmitt sambærilegir stjórnmálaflokkar, jafnaðarmenn og aðrir vinstri menn, sem byggðu upp skandinavísku velferðarríkin á löngum stjórnartíma. Þeirra eru farsælustu samfélög jarðarinnar, sem koma best út úr öllum alþjóðlegum samanburði á lífskjörum almennings, samfélagsgæðum, samkeppnishæfni atvinnulífs og nýsköpun. Þangað eigum við Íslendingar nú að leita fyrirmynda í því sem best hefur tekist hjá frændum okkar og vinum. Í staðinn eigum við að hverfa frá hinni bandarísku öfgafrjálshyggju sem innleidd var hér í vaxandi mæli frá 1995.

Stefnan í Evrópumálum greinir stjórnarflokkana hins vegar að. Samfylking leggur ríka áherslu á aðildarumsókn strax, sem borin verði svo undir þjóðina. V-G eru andvíg aðild, en hafa þó sagt að þau vilji leyfa þjóðinni að ráða. Það er allt sem þarf. Þess vegna verður að sækja um aðild til að fá upp á borð hvaða skilyrði bjóðast svo þjóðin geti tekið afstöðu til þeirra. Sjálfur tel ég miklar líkur á að þjóðin felli jafnvel góðan aðildarsamning. Ef svo fer þarf nýja leið, því krónan hefur brugðist okkur. Þessi mál þarf að útkljá án tafar.

Mikilvægast er að núverandi stjórnarflokkar starfi vel áfram með traustan meirihluta, sem þarf til að taka erfiðar ákvarðanir á endurreisnartímanum. Jóhanna Sigurðardóttir og Steingrímur J. Sigfússon eru trygging almennings fyrir því að heiðarleika, vinnusemi og sanngirni verður gætt í því sem framundan er.

Höfundur er prófessor.