Björn Mikkaelsson: Neyddist til að svíkja fólkið

„Það er rétt hjá þeim," segir Björn Mikkaelsson um sögu hjónanna frá Miðhúsum í Kollafirði sem fjallað var um á Vísi fyrr í dag. Í samtali við fréttastofu sagði Viðar Guðmundsson frá því að hann og kona hans borguðu Birni tæpar tíu milljónir upp í Finnskt einingahús sem þau fengu aldrei. Annars vegar 2,7 milljónir í staðfestingargjald og síðar 7,2 milljónir.

Björn segir þau hjónin fara með rétt mál. Aðspurður um skýringu á þessu svaraði Björn: „Hún er sáraeinföld. Það var verið að vinna í þessu fyrir þau og það var bara ekkert komið lengra þegar ég fer sjálfur í þrot. Ég var svikinn um greiðslur og það vatt upp á sig og þar með fer ég að svíkja annað fólk," segir Björn.

Í samtali við fréttastofu sagði Viðar að hann hefði hringt utan í finnska fyrirtækið sem framleiðir húsin en fengið að heyra þar að ekki einu sinni öll fyrri greiðslan hefði borist fyrirtækinu. „Það er líka rétt hjá þeim," segir Björn. Hann segir að það hafi hreinlega ekki verið komið svo langt. „Í millitíðinni fór það í annað á reikninum hjá mér og svo bara sprakk allt," segir Björn. Aðspurður hvort ekki hefði verið eðlilegra að senda peningana frá Viðari og frú jafnóðum út til finnska fyrirtækisins sagði Björn: „Jú, jú. Það hefði verið það. Þetta er bara leiðindamál."

Aðspurður hvernig honum liði útaf þessu máli svaraði Björn: „Mér líður hryllilega yfir því. Ég er búinn að reyna allt sem í mínu valdi stendur til að leiðrétta það en ég hef ekki bolmagn í það." Hann viðurkennir að um eitt annað svipað tilfelli sé að ræða. „Já eitt annað tilfelli í Borgarfirði."

Viðar sagði einnig frá því að Björn hafi verið hættur að svara þeim hjónum í síma. „Það er kannski af því að ég er ekki með sama síma, hann var tekinn þegar fyrirtækið var tekið."

Björn segir að hann hafi ætlað að selja húsið sitt til þess að bæta hjónunum fyrir vestan upp tjónið. Eignarhlutur hans í húsinu hafi hinsvegar horfið þegar gengi krónunnar hrundi. Hann segist hafa átt rúmar 35 milljónir í húsinu áður en allt hrundi.

Spurður hvort hann teldi sig vera heiðarlegan í viðskiptum alla jafna sagði hann: „Ég tel mig ekki vera óheiðarlegan. Þetta er alveg skítamál en þetta eitthvað sem ég ræð ekki við."

Björn hefur sagt frá því hvernig þrír aðilar sviku hann og því hafi hann farið í þrot. Hann segir að sjálfur hafi hann tapað vel yfir tuttugu milljónum þessara þriggja kúnna. Hann segir þau Viðar og Barböru vera andstæður þeirra sem sviku hann. „Þetta er toppfólk. Þvílíkt fyrirmyndarfólk en ég veit ekki hvað ég get gert fyrir þau skilurðu? Ég er ekki búinn að hafa það gott yfir þessu góða fólki."