Ólafur Þór verður sérstakur saksóknari

Björn Bjarnason dóms- og kirkjumálaráðherra hefur í dag, að höfðu samráði við fulltrúa allra þingflokka í allsherjarnefnd Alþingis, falið Ólafi Þór Haukssyni, sýslumanni á Akranesi, að gegna embætti sérstaks saksóknara.

Framlengdur umsóknarfrestur um embættið rann út í gær og barst ein önnur umsókn. Í tilkynningu frá ráðuneytinu segir að sá umsækjandi hafi ekki fullnægt skilyrðum sem gerð voru til starfsins.

„Ólafur mun veita forstöðu rannsóknar- og saksóknaraembætti skv. lögum nr. 135/2008 sem rannsaka á grun um refsiverða háttsemi í aðdraganda, tengslum við og kjölfar bankahrunsins, hvort sem það tengist starfsemi fjármálafyrirtækja, annarra lögaðila eða einstaklinga, og eftir atvikum fylgja rannsókn eftir með saksókn," segir ennfremur í tilkynningunni.

Ólafur tekur við embættinu frá og með 1. febrúar 2009 og gildir sú skipan uns embættið verður lagt niður eða það sameinað annarri ríkisstofnun, sbr. ákvæði laga um embætti sérstaks saksóknara, en þá mun hann taka við embætti sýslumanns á Akranesi að nýju.