Gerir ráð fyrir 1,5 prósentustiga stýrivaxtalækkun eða meir

Hagfræðideild Landsbankans gerir ráð fyrir að stýrivaxtalækkun Seðlabankans þann 8. apríl muni að minnsta kosti nema 1,5 prósentustigi og jafnvel meiru.

Í daglegu fréttabréfi sínu segir hagfræðideildin að hún byggi þetta mat sitt á nýjustu verðbólgumælingu Hagstofunnar ásamt því að öruggar vísbendingar eru um að verðbólgan muni hjaðna hraðar en áður var gert ráð fyrir.

Þar að auki segir í fréttabréfinu að hagfræðideildin búist við að peningastefnunefnd Seðlabankans muni hér eftir hittast í hverjum mánuði og að stýrivaxtalækkanir verði því á góðu skriði það sem eftir er ársins.