Gífurlegar lækkanir á fasteignaverði í Bretlandi

Húsnæðisverð í Bretlandi lækkaði í maí um 2,5% frá fyrri mánuði. Þetta var því sjöundi mánuðurinn í röð þar sem húsnæðisverð lækkar í Bretlandi og er því á pari við fyrrum lengsta samfellda tímabil húsnæðisverðslækkana í upphaf tíunda áratugarins.

Greining Kaupþings fjallar um málið í Hálf fimm fréttum sínum. Þar segir að lækkunin í maí sé söguleg í ljósi þess að hún er sú mesta í sögu mælinga húsnæðisverðsvísitölunnar og meiri en nokkrar mælingar sýndu í fasteignakreppunni við upphaf tíunda áratugarins. Lækkun frá fyrra ári nam 4,4% sem er mesta lækkun á milli ára síðan í desember 1992.



Hrap húsnæðisverðs í maímánuði er áminning um það hversu hratt það getur lækkað. Húsnæðisverð í Bretlandi hefur nú lækkað um 7% frá hápunkti sínum árið 2007. Ef fram fer sem horfir, og spár greiningaraðila ganga eftir, munu þær lækkanir sem fram hafa komið aðeins vera upphafið á frekari lækkunum.

Spáð er að í árslok 2009 hafi verð á fasteignum lækkað allt að um fimmtung frá hæsta gildi. Það má því búast við álíka, ef ekki meira, falli húsnæðisverðs og var við samdráttinn við upphaf tíunda áratugarins.